Eksklüziv: AFFA Santuşu qovub Rəşad Sadıqovu gətirmək istəyir
Supersport.Az portalının əldə etdiyi məlumata görə, AFFA rəhbərliyi Azərbaycanın futbol yığmasının baş məşqçisi Fernando Santosu istefaya göndərmək fikrinə düşüb.
Milli komandanın portuqaliyalı Santuşun başçılığı bir il müddətində 8 oyunun 7-də məğlub olub, qələbəsiz qalması, UEFA Millətlər Liqasının D liqasına yuvarlanması çoxlarını əsəbləşdirib. Əksəriyyət hesab edir ki, baş məşqçi Fernando Santuş qovulmalı, yerli mütəxəssislərdən biriylə əvəz olunmalıdır.
Supersport.Az-a AFFA-nın Fernando Santuşu istefaya göndərib, "Zirə"nin baş məşqçisi Rəşad Sadıqovu gətirmək istədiyi haqda məlumat verilib. Sadıqov həm millidə, həm də klubda çalışmaq istəyini çatdırıb. AFFA rəhbərliyi isə R.Sadıqova yalnız yığma komandada işləmək təklifini irəli sürüb. Buna görə hələ ki, tərəflər razılığa gəlməyib.
AFFA 2024-cü ilin iyun ayında Fernando Santuşla 3+1 illik müddətə müqavilə imzalayıb. Əgər Santuş özü istefa verməsə, göndərilsə, futbol qurumu böyük məbləğdə təzminat ödəməlidir.
Rəşad Sadıqov əvvəllər "Qarabağ"ın U-19 komandasının, həmçinin Azərbaycanın U-21 yığmasının baş məşqçisi olub. 42 yaşlı R.Sadıqov dəfələrlə milli komandada çalışmaq istədiyini bildirib.
Qeyd edək ki, "Şamaxı"nın baş məşqçisi Ayxan Abbasov hazırda Azərbaycanın U-21 yığma komandasını da çalışdırır.
