"Qarabağ"ın güclü rəqibi "Olimpik Lion"u tanıyaq - Foto

Supersport.Az-ın məlumatına görə, Avropa Liqasının Liqa mərhələsində "Qarabağ"ın rəqiblərindən biri "Olimpik Lion" güclü komandadır.

Əvvəla bildirək ki, Azərbaycan klubuna hörmətlə yanaşan Fransa təmsilçisi, rəsmi saytında matçın anonsunu Azərbaycan dilində verib. Qarşılaşma noyabrın 28-də saat 21:45-də Tofiq Bəhramov adına Respublika stadionunda keçiriləcək.

"Olimpik Lion"un futbolçularının ümumi dəyəri 240 milyon 300 min avrodur. "Qarabağ"da bu rəqəm 20 milyon 230 min avrodur.  

74 yaşlı "Olimpik Lion" 36 ildir ölkəsinin birinci liqasında mübarizə aparır, hazırda 18 klub sırasında 18 xalla 5-cidir, əsasən 4-3-3 taktiki sxeminə üstünlük verir. Komandanın baş məşqçisi 45 yaşlı Pyer Saj, kapitanı 33 yaşlı Aleksandr Lakazettedir.

"Olimpik Lion" geniş heyətə malikdir: 29 futbolçusu, 18 legioneri, yığmalarda 12 üzvü var, yaş ortalaması 26.40-dır.  

Fransa klubu 10 milyon avroluq Vilfrid Zaha, 15 miyonluq Mussa Niakate, Malik Fofana, 18 milyonluq Səid Benrahma, Gift Orban, Maksens Kakere, Ernest Nuamah, 20 milyon avroluq Rayan Çerki, Georges Mikautadze qiymətində futbolçulara malikdir.

Komandanın əsas silahlarından biri, 9 milyon avroluq qiyməti olan Fransa yığmasının keçmiş hücumçusu, 33 yaşlı Aleksandr Lakazettedir.

"Olimpik Lion"un müxtəlif mövqelərdəki futbolçularının dəyəri belədir:

Qapıçılar - 9,8 milyon avro, Müdafiəçilər - 63,15 milyon avro, Yarımmüdafiəçilər - 65,35 milyon avro, Hücumçular - 102 milyon avro.  

"Olimpik Lion" Fransa Superkubokunun 8 qat qalibidir (1973, 2002, 2003, 2004, 2005, 2006, 2007, 2012), 7 qat ölkə çempionudur (2001–02, 2002–03, 2003–04, 2004–05, 2005–06, 2006–07, 2007–08), 5 dəfə ölkə kubokunun (1963–64, 1966–67, 1972–73, 2007–08, 2011–12), bir dəfə Liqa kubokunun sahibidir (2000–01).

"Lion" UEFA Çempionlar Liqasının iki dəfə yarımfinalçısı (2009–10, 2019–20), Avropa Liqasının yarımfinalçısı (2016–17), Kuboklar Kubokunun yarımfinalçısı (1963–64) olub. 

"Olimpik Lion" 1997-ci ildə İntertoto Kubokunu qazanıb. 

"Qarabağ" da 74 yaşa malikdir, 27 futbolçusundan 15-i legioner, 14-ü yığma komandanın üzvüdür, yaş ortalaması 27,4-dür. Ağdam klubu 11 qat Azərbaycan çempionu, 8 qat ölkə kubokunun qalibidir. "Qarabağ" ardıcıl 11 ildir Avropa yarışlarının qrup mərhələsində mübarizə aparır. Ağdam təmsilçisi Çempionlar Liqasının qrup raundunda, Avropa Liqasının 1/8 final mərhələsində bir, Konfrans Liqasının pley-off raundunda isə iki dəfə iştirak edib.   

Azərbaycan çempionunun ən bahalı oyunçusu braziliyalı hücumçu Juninyodur (2 milyon avro). Bu baxımdan  sonrakı yerlərdə ukraynalı Aleksey Kaşuk (1.8 milyon avro), Leandro Andrade, Mateuş Koxalski (1.5 milyon avro), Yassin Benzia (1.2 milyon avro) gəlir.

"Qarabağ" Fransa futboluna yaxşı bələddir. Azərbaycan klubu indiyədək bu ölkənin bir neçə komandasıyla qarşılaşıb. 2014-cü ildə Avropa Liqasının qrup mərhələsində "Qarabağ" "Sent-Etyen"lə evdə 0:0, səfərdə 1:1 oynayıb. 2022-ci ildə UEFA Konfrans Liqasının pley-off mərhələsində Qarabağ komandası Fransada "Olimpik Marsel"ə 1:3, ölkəmizdə 0:3 məğlub olaraq mübarizəni dayandırıb.      

2022-ci ilin 15 sentyabrında Avropa Liqasının qrup mərhələsində "Qarabağ" Bakıda Fransanın "Nant" klubunu 3:0 hesablı məğlub edib.

"Qarabağ"ın əlcəzairli futbolçusu Yassin Benzia Fransa futbolunu çox yaxşı bilir. Benzia məhz "Olimpik Lion"un yetirməsidir və 2012-2015-ci illərdə əsas komandada forma geyinib. Yassin həmçinin Fransanın "Lill" (2015-2020) və "Dijon" (2020-2023) klubunda çıxış edib. 

Fransada dünyaya gələn "Qarabağ"ın 32 yaşlı mərakeşli futbolçusu Abdullah Zubir "İstres", "Lans" komandasında oynayıb.  

"Olimpik Lion" Avropa Liqasının Liqa mərhələsinin 4 turundan sonra 36 komanda sırasında 7 xalla 9-cu, "Qarabağ" isə 3 xalla 29-cudur.

Fransa klubu Azərbaycan komandasının qarşılaşacağı "Olimpiakos"u ilk turda evdə 2:0, "Qlazqo Reyncers"i səfərdə 4:1 məğlub edib, "Beşiktaş"a öz meydanında 0:1 uduzub, "Hoffenhaym"la səfərdə 2:2 oynayıb.

"Qarabağ" isə səfərdə "Tottenhem"ə 0:3, "Malmö"yə evdə 1:2, "Ayaks"a 0:3 məğlub olub, səfərdə "Bodo-Glimt"ə 2:1 qalib gəlib.   

"Olimpik Lion" büdcə, heyət, usta futbolçularının çoxluğu baxımından "Qarabağ"dan üstündür. Ancaq fransız klubu məğlubedilməz deyil. Azərbaycan klubu bu güclü rəqibiylə Bakıda keçirəcəyi matçda ən azı heç-heçə etsə, yaxşı nəticə hesab oluna bilər. 

Azərbaycan və Fransa çempionatını da müqayisə etmək doğru olmazdı. Azərbaycan çempionatı oyuncaqdır.

"Olimpik Lion" futbolçularının qiyməti 892.50 milyonluq PSJ kimi lider komandaya qarşı da mübarizə aparır.

Fransa çempionatının 11-ci turunda "Sent-Etyen"lə derbidə diziylə qol vuraraq "Olimpik"ə qələbə qazandıran mərkəz hücumçusu Aleksandr Lakazette bildirib ki, hər şey mükəmməl deyildi. Lakezette birinci iqada 10 oyunda 2 qol vurub, 1 effektli ötürmə verib, Avropa Liqasının 4 matçında 3 qol vurub. 

Avropa Liqasının Liqa mərhələsi göstərir ki, "Qarabağ"ın güclənməyə ehtiyacı var.

"Qarabağ" - "Olimpik Lion" oyunu noyabrın 28-də saat 21:45-də Tofiq Bəhramov adına Respublika stadionunda keçiriləcək.

Anar Cəfərsoy