Azərbaycan Cüdo Federasiyası qalibləri pulla mükafatlandırıb
Digər, Cüdo, Foto
21 Noyabr 2018 - 21:19
Bakı İdman Sarayında cüdo üzrə Azərbaycan çempionatı keçirilir.Supersport.Az-ın məlumatına görə, yarışın açılış mərasimində gənclər və idman nazirinin müavini İsmayıl İsmayılov, Azərbaycan Cüdo Federasiyasının baş katibi Elmar Babanlı çıxış edərək ölkəmizdə dövlət səviyyəsində idmana göstərilən diqqət və qayğıdan danışıblar. Natiqlər son vaxtlar beynəlxalq yarışlarda, Avropa və dünya çempionatlarında qazanılan uğurlarda cüdoçularımızın xüsusi payı olduğunu qeyd ediblər. Dövlət himni səsləndirildikdən sonra respublika çempionatı açıq elan olunub.
Cüdo üzrə Azərbaycan çempionatında 56 klubdan 500-ə yaxın idmançı mübarizə aparır. Yarışın ilk günü Leyla Əliyeva (48 kq), Rəşad Yelkiyev (60 kq), Elmira Mustafayeva (57 kq), Rüfət Məmmədov (73 kq), Aytəkin Paşazadə (+78 kq) və Məmmədəli Mehdiyev (90 kq) bütün rəqiblərinə qalib gələrək Azərbaycan çempionu adını qazanıblar. Qalib və mükafatçılara medallar, Azərbaycan Cüdo Federasiyasının diplomları, pul mükafatları təqdim olunub.
