"Qarabağ" - "Qalatasaray" matçına maraq azaldı, ucuz biletlər satıldı, bahaları qaldı

"Qarabağ" - "Qalatasaray" matçına maraq azaldı, ucuz biletlər satıldı, bahaları qaldı
Futbol, Eksklüziv
20 Mart 2023 - 11:00
Supersport.Az-ın əldə etdiyi məlumata görə, martın 26-da Bakı Olimpiya Stadionunda təşkil olunacaq "Qarabağ" - "Qalatasaray" xeyriyyə matçına maraq azalıb. Məsələ burasındadır ki, iki gün əvvəl qarşılaşmaya 55 min bilet satıldığı halda, indi bu rəqəm 57 minə qalxıb.

Supersport.Az-a "Qarabağ" klubunun mətbuat katibi Gündüz Abbaszadə oyuna marağın azalmasının səbəbini açıqlayıb, azarkeşləri qardaşlıq matçına səsləyib. O, bildirib ki, qarşılaşma üçün 3, 5 manat olan biletlərin hamısı qurtarıb.

Oyuna bahalı - 30, 50, 100 manatlıq biletlər qalıb.

"Fürsətdən istifadə edib azarkeşlərimizi qardaşlıq, xeyriyyə oyununa dəvət edirəm, tələsin. Yəqin ki, həm son zamanlar qeyri-iş günləri olduğundan, həm də aşağı qiymətdə olan biletlər tükəndiyindən oyuna maraq azalıb" - deyə, G.Abbaszadə qeyd edib. 

Qeyd edək ki, Bakı Olimpiya Stadionunun tamaşaçı tutumu 68,700 nəfərdir. "Qarabağ" - "Qalatasaray" matçına 62 mindən artıq bilet satışa çıxarılıb.

Qarşılaşma martın 26-ı saat 20:00-da oynanılacaq.

Qardaşlıq oyunundan əldə olunacaq bütün gəlirlər Türkiyədə baş vermiş zəlzələdən əziyyət çəkənlərə yardım üçün göndəriləcək.

Digər xəbərlər