Eksklüziv: "Sabah"da "pul dava"sı: Maqsud Adıgözəlovla Balakişi Qasımov klubu çökdürüb
"Sabah" Futbol Klubunda idarəçilik bərbad vəziyyətdədir.
8 illik tarixi olan paytaxt təmsilçisinin ölkədə maliyyə imkanları yüksək olsa da, klubun prezidenti Maqsud Adıgözəlov qeyri-peşəkar olduğundan, milyonları boşuna xərclədiyindən, daha çox səviyyəsi aşağı legionerlər gətirdiyindən komanda fiaskoya uğrayıb, ölkə çempionluğuna, kuboka həsrət qalıb.
"Sabah" məşqçiləri əlcək kimi dəyişir, indiyədək komanda 12 baş məşqçini yola salıb.
Maqsud Adıgözəlovla Balakişi Qasımovun rəhbəri olduğu klubun əsas və gənclər komandası Avropa yarışında qapazaltı olur, "topla döyülür".
"Sabah" klubu hazırda premyer liqada uğursuz çıxış edir, ancaq ölkə kubokunun yarımfinalına vəsiqə qazanıb.
"Sabah"ın rəhbərlərindən biri Balakişi Qasımovun gətirdiyi rusiyalı təcrübəsiz məşqçi Vasili Berezutskinin komandası son 6 oyun çempionatda qələbəyə həsrətdir.
Bu klubun büdcəsi böyük olsa da, rəhbərlik hərdən simiclik edir. "Neftçi"nin rəsmiləri "Sabah"ı ölkə kubokunun yarımfinalından kənarlaşdırmaq üçün hər futbolçusuna 20 min manat mükafat ayırıb. "Sabah" klubunun rəhbərliyi isə xəsislik edərək, bu oyunlar üçün ənama söz verməyib. "Sabah"ın başçıları baş məşqçi Vasili Berezutskiylə futbolçulara bildirib ki, komanda yalnız kuboku qazanacağı təqdirdə, mükafat, hərəyə 20 min manat veriləcək. İddiaya görə, klub rəhbərliyinin belə hərəkəti, məşqçilər heyətini, oyunçuların narazılığına səbəb olub, komandada "pul dava"sı başlayıb.
"Sabah"ın rəhbərliyinin komanda avrokubok yarışından kənarda qalacağı halda, rusiyalı baş məşqçi Vasili Berezutskini qovacağı bildirilir.
Azərbaycan futbolunda biabırçı faktlardan biri də budur ki, "Sabah"ın bərbad fəaliyyət göstərən rəhbərləri AFFA-nın idarəçiliyində yer alırlar. Maqsud Adıgözəlov AFFA-nın Klublar Komitəsinin sədri, İcraiyyə Komitəsinin üzvüdür, Balakişi Qasımov isə AFFA-nın vitse-prezidentidir. İqtisadiyyat naziri Mikayıl Cabbarovun xalasıoğlu Balakişi Qasımov həm də İTV-nin baş direktorudur. İctimai Televiziyada "susmaq rejimi"nə keçilərək AFFA-nın bərbad fəaliyyəti haqda tənqidi danışılmır.
Supersport.Az
