Qurban Qurbanov nəticədən narazıdır: "Daha aqressiv olmalıyıq"

"Oyundan əvvəl bilirdik ki, "Şerif"" güclü rəqibdir və bunun şahidi olduq. Çox yaxşı müdafiə olunan və çox intizamlı oynayan komandaya qarşı mübarizə apardıq. Rəqibi belə oyuna görə təbrik etmək istəyirəm. Düşünürəm ki, bizi Bakıda ağır cavab oyunu gözləyir. Hansı ki, hər birimiz üçün son oyun olacaq və buna hazır olmalıyıq".

Supersport.Az-ın məlumatına görə, "Qarabağ"ın baş məşqçisi Qurban Qurbanov Avropa Liqasının pley-off mərhələsinin ilk oyunları çərçivəsində səfərdə "Şerif"ə məğlub olduqları (1:0) matçdan sonra belə deyib.

Təcrübəli mütəxəssis ilk oyunun nəticəsinə görə, rəqibin mərhələ keçmək şansının yüksək olduğunu bildirib. Lakin o, cavab oyunun yüksək nəticə qazanmaq üçün əllərindən gələni edəcəklərinə söz verib:

"Keçən il "Şerif"i mübarizədən kənarlaşdırmışdıq. Futbolda belə nəticələr olur və buna hazır olmalıyıq. İlk oyunda qeydə alınan hesab rəqib üçün yaxşı nəticədir. Amma buna baxmayaraq, bizim şansımız var. Sadəcə, bəzən düşündüyümüz oyun alınmayanda, əhval-ruhiyyəmiz yaxşı olmur".

Qurban Qurbanov səfər matçındakı uğursuz oyunu rəqibin yaxşı mübarizə aparması ilə əlaqələndirib:

"Rəqibi nəzərə almaq lazımdır. "Şerif" çox yaxşı bağlanırdı. Ümumiyyətlə, bizim üçün burada oynamaq elə də asan deyildi, ağır idi".

46 yaşlı çalışdırıcı cavab oyunu üçün heyətdə ciddi dəyişiklik etməyəcəyini vurğulayıb:

"Taktika dedikdə, bir o qədər də dəyişiklik olmayacaq. Sadəcə, ola bilər, sistemdə kiçik bir dəyişiklik olsun. Qalib gəlmək üçün daha aktiv, daha aqressiv olmalıyıq. Düşünürəm ki, bunu öz meydanımızda edə biləcəyik".

Mütəxəssis ötən illə müqayisədə builki nəticələrinin yaxşı olmaması fikri ilə razılaşıb:

"Ümumi baxsaq, özümüzü düşünsək, nəticəmiz yaxşı deyil. Ötən il Çempionlar Liqasının qrupunda oynamışdıq, indi isə Avropa Liqasının qrup mərhələsi uğrunda mübarizə aparırıq. İndiki nəticə üçün bəlkə də, fikrinizlə razı olaram".