"Neftçi"nin yeni baş məşqçisi bu şəxs olacaq
Supersport.Az-ın əldə etdiyi məlumata görə, "Neftçi"nin yeni baş məşqçisi Samir Abasov ola bilər.
Paytaxt klubu Roman Qriqorçuku yola salmazdan əvvəl Samir Abasovla danışıqlar aparırdı. Azərbaycan Premyer Liqasının 8-ci turunda səfərdə "Neftçi"dən xal qoparan "Sumqayıt"ın baş məşqçisi Samir Abasovla "ağ-qaralar"ın idman müşaviri Kamil Məmmədovun ilk görüşünü videogörüntüyə almışdıq. Saytımız həmin vaxt, 28 sentyabrda yazmışdı ki, "Neftçi" Roman Qriqorçuku qovub, Samir Abasovu gətirmək istəyir. Paytaxt klubu bu gün Qriqorçukla yolların ayrıldığını açıqlayıb.
"Neftçi"nin yeni baş məşqçisi vəzifəsinə namizəd Tərlan Əhmədovla Arif Əsədovun da olduğu bildirilir. Paytaxt klubu türkiyəli mütəxəssislərdən "Qalatasaray"a UEFA Kubokunu qazandırmış Fatih Terimlə "Fenerbahçe"nin keçmiş baş məşqçisi İsmail Kartalla maraqlanır.
"Sumqayıt"ın baş məşqçisi Samir Abasovun klub prezidenti Riad Rəfiyevlə münasibətləri soyuqdur. "Neftçi" böyük ehtimalla klubu 2021-ci ildə çempion edən Abasovu gətirəcək.
