Video: "Hypers Guba"nın baş məşqçisi Vüqar Nadirov: "Hər oyunu final matçı hesab edirik"
Supersport.Az-a müsahibəsində Azərbaycanın ikinci liqasında iştirak edən "Hypers Guba" klubunun baş məşqçisi Vüqar Nadirov maraqlı fikirlər bildirib.
"Qarabağ"ın, milli komandanın keçmiş futbolçusu, komandasının yüksək şəraiti olduğunu, hər oyuna final matçı olaraq yanaşdıqlarını söyləyib.
V.Nadirov, təcrübəli mütəxəssislərdən Qurban Qurbanov, Berti Foqts, Robert Prosineçkidən "oğurladıqlarını" futbolçulara öyrətdiyini, hədəflərinin yığma komandalara futbolçu hazırlamaq, həmçinin əvvəl birinci, sonra premyer liqaya vəsiqə qazanaraq, uğurlar qazanmaq olduğunu diqqətə çatdırıb.
O, bir yaşlı klubunda təcrübəli oyunçulardan Cavid İmamverdiyev, Nurlan Novruzov, Qeyrət Əliyev, Namaz Hüseynov, İlqar Ələkbərovun da forma geydiyini, əksər futbolçularının çox səhvlər etdiyini, bundan dərs almağın vacibliyini qeyd edib.
Baş məşqçi Vüqar Nadirov klub prezidenti Ayaz Abdullayevə komandaya verdiyi dəstəyə görə, təşəkkürünü bildirib, sponsorları futbolumuza kömək etməyə çağırıb.
Qeyd edək ki, "Hypers Guba" klubu 1 il əvvəl təsis olunub və ev oyunlarını Quba Olimpiya İdman Kompleksinin 6 min 800 tamaşaçı tutumlu stadionunda keçirir.
