Azərbaycan 3 qızıl medal qazandı
![Azərbaycan 3 qızıl medal qazandı](https://supersport.az/storage/news/2024/06/09/55kg_gr_eldaniz_azizli_aze_250_x2_1024x682_1717956319-full.jpg)
Supersport.Az-ın məlumatına görə, Azərbaycan pəhləvanları Macarıstanın paytaxtı Budapeştdə keçirilən güləş üzrə reytinq turnirində uğurlu çıxışla yadda qalıblar.
Son yarış günündə 4 yunan-Roma güləşçimiz mübarizə aparıb.
Eldəniz Əzizli (55 kq) iranlı Puya Dad Marza (6:1), gürcüstanlı Nuqzari Tsurtsumiaya (8:0) və braziliyalı Marat Qaripova (9:0) qalib gələrək fəxri kürsünün ən yüksək pilləsinə qalxıb.
Həsrət Cəfərov (72 kq) da eyni nəticəni təkrarlayıb. Bu dəfə özünü yuxarı çəkidə sınayan istedadlı güləşçimiz iranlı Seyid Söhrabi (12:6), macarıstanlı Kristofer Klanyi (7:0), gürcüstanlı Şmaqi Bolkvadze (7:1) və misirli Mustafa Alameldin (5:2) üzərində qələbə qazanaraq yarışın baş mükafatına yiyələnib.
Onunla eyni çəkidə çıxış edən Ülvü Qənizadə ilk mərhələdə koreyalı Hyeonjin Kanqı (3:2) mübarizədən kənarlaşdırsa da, 1/4 finalda macarıstanlı Kristian Vançayla görüşü zədə üzündən yarımçıq saxlamaq məcburiyyətində qalıb.
Sənan Süleymanova (77 kq) da uğurlu çıxış etməyə zədə mane olub. Düzdür, həmyerlimiz yarımfinaladək irəliləyib. Qazaxıstanlı Demeu Jadrayev 1/8 finalda xalçaya çıxmadığı üçün Süleymanov birbaşa 1/4 finala yüksəlib. Bu mərhələdə İranın təcrübəli güləşçisi Məhəmməd Əli Gerayini 6:1 hesabıyla üstələyən Sənan finalın bir addımlığında yaponiyalı Nao Kusakaya minimal fərqlə (1:2) uduzub. Bu görüşdə zədəsi ağırlaşdığı üçün istədiyi kimi güləşə bilməyən Süleymanov bürünc medal uğrunda qarşılaşmaya çıxmayıb.
Beləliklə, reytinq turnirini 3 qızıl medalla başa vuran millimiz 85 xalla komanda hesabında 4-cü yeri tutub. Xatırladaq ki, ötən gün Murad Məmmədov (63 kq) çempion olub.
![](https://supersport.az/storage/news/2024/06/09/55kg_gr_eldaniz_azizli_aze_250_x2_1024x682_1717956319-full.jpg)
![](https://supersport.az/storage/news/2024/06/09/72kg_gr_hasrat_jafarov_aze_df_moustafa_hussein_fathy_alameldin_egy348_x2_1024x682_1717956320-full.jpg)
![](https://supersport.az/storage/news/2024/06/09/55kg_gr_eldaniz_azizli_aze_df_marat_garipov_bra256_x2_1024x683_1717956320-full.jpg)