Dünyanın ən yaxşı məşqçiləri - Lobanovskiylə Terim də siyahıda var
Futbol
03 May 2020 - 21:48
Supersport.Az-ın məlumatına görə, "Four Four Two" jurnalı dünyada futbol tarixinin ən yaxşı mütəxəssislərini müəyyənləşdirib. "100"lükdə türk məşqçi də var.
"Mançester Yunayted"in sabiq baş məşqçisi Aleks Ferguson ilk sırada yer alıb. 27 il klubu çalışdıran şotland mütəxəssis komandasına böyük uğurlar qazandırıb.
Niderlandın futbol tarixinə adını qızıl hərflərlə yazdıran "Ayaks"ın keçmiş baş məşqçisi Rinus Mixels ikincidir. "General" ləqəbli mütəxəssis 1988-ci ildə ölkəsini Avropa çempionu edib.
"Ayaks"la "Barselona"nın tarixində xüsusi yer olan, "total futbol"un memarı Yoxan Kroyf üçüncüdür.
"Liverpul"un əfsanəsi, şotland mütəxəssis Bill Şenkli dördüncüdür.
"Barselona"nın adını uğurlarla tarixə həkk etdirən, hazırda "Mançester Siti"ni çalışdıran ispan mütəxəssis Pep Qvardiola 5-cidir.
"Milan"ın əfsanəvi məşqçisi Arriqo Sakki siyahıda 6-cıdır. Milan təmsilçisini 5 il çalışdıran mütəxəssis 2 dəfə Çempionlar Kubokunu qazandırıb. İtaliyalı məşqçi peşəkar futbolçu olmamasıyla bağlı "Jokey olmaq üçün əvvəlcə at olmağa ehtiyac yoxdur" cavabını verərək yaddaşlarda qalıb.
Dünyanın ən yaxşı məşqçiləri sırasında 7-ci olan "Mançester Yunayted"in əfsanəsi Mett Basbi 24 il klubu çalışdıraraq komandada ən çox fəaliyyət göstərən mütəxəssislərindəndir. Şotland məşqçinin qurduğu komanda "Basbinin uşaqları" ləqəbini alıb, 1958-ci ildə təyyarə qəzasında 8 futbolçusu həlak olub.
Argentina əsilli fransız Elenio Herrera 8-cidir. O, 1961-də "Barselona" Çempionlar Kubokunun finalına daşıyıb, İtaliya "İnter"inə 1964, 1965-ci illərdə iki mövsüm Çempionlar Kubokunu qazandırıb.
Ernst Happel 9-cudur. Avstriyalı mütəxəssis "Feyenoord"la "Hamburq"u Çempionlar Kubokunun qalibi edib. O, iki fərqli klubla Çempionlar Liqasının çempionu olan 5 məşqçidən ilkidir.
Ukraynalı mütəxəssis Valeri Lobanovski reytinqdə 10-cudur. "Futbola həndəsəni gətirən" məşqçi hesab olunan Lobanovski Kiyev "Dinamo"suna 2 dəfə Kuboklar Kubokunu, bir dəfə UEFA Superkubokunu qazandırıb. Mütəxəssisin başçılığıyla 1988-ci ildə SSRİ yığması Avropa çempionatının finalında Niderlanda məğlub olaraq ikinci olub.
Türkiyınin "Qalatasaray" klubunun baş məşqçisi Fateh Terim 100 məşqçi sırasında 99-cudur. Mütəxəssis 2000-ci ildə kluba UEFA Kubokunu qazandırıb.