İlk dünya kubokunda 15 ölkədən idmançılar mübarizə aparacaqlar

İlk dünya kubokunda 15 ölkədən idmançılar mübarizə aparacaqlar
Digər, Gimnastika
02 Fevral 2017 - 12:37
Azərbaycan Gimnastika Federasiyası bu il yarışlar mövsümünə batut gimnastikası və tamblinq üzrə dünya kuboku yarışları ilə start verəcək.

Supersport.Az xəbər verir ki, Yeni Olimpiya dövrünün batut gimnastikası üzrə ilk dünya kuboku yarışı fevralın 18-19-da Milli Gimnastika Arenasında keçiriləcək. On beş ölkədən 85 batutçu və tamblinqçi iki gün ərzində 2017-ci ildə qüvvəyə minən yeni qaydalar əsasında gərgin mübarizə aparacaq. Yarışların birinci günündə təsnifat, növbəti günündə isə final mərhələləri olacaq.

Azərbaycanı bu yarışlarda fərdi və sinxron proqramda İlya Qrişunin, Oleq Piunov, Ruslan Ağamirov, Svetlana Makştarova, Veronika Zemlyanaya və tamblinq cığırında Mixail Malkin təmsil edəcəklər.

Ölkəmizdə 2013-cü ilin sonundan inkişaf etməyə başlayan batut gimnastikası üzrə mötəbər tədbir - dünya kuboku artıq ikinci dəfədir təşkil olunur. Tamblinq üzrə dünya kuboku isə Azərbaycanda ilk dəfə təşkil olunacaq. Gimnastika yarışlarının daim yüksək səviyyədə təşkil olunması bu mötəbər turnirlərin də bir çox yeniliklərlə yadda qalacağını deməyə əsas verir.

Tamaşaçılar havada pərvazlanan ulduz batutçu və tamblinqçilərin təqdimatında maraqlı mübarizənin şahidi olmaqla yanaşı, əyləncəli müsabiqələrdə və fləşmoblarda da iştirak edə biləcəklər.

Digər xəbərlər