Tahir Gözəl: "Xocalı soyqırımı ümumbəşəri faciədir" - Şəkil

"Qarabağ"ın bazasında Xocalı soyqırımının 28-ci ildönümünə həsr olunan tədbir keçirilib.

Supersport.Az-ın klubun saytına istinadən məlumatına görə, "Qarabağ"ın vitse-prezident Tahir Gözəl komandayla görüşüb. Görüş Xocalı qurbanlarının xatirəsini 1 dəqiqəlik sükutla yad etməklə başlayıb.

"Qarabağ barəsində fikir ifadə etmək həmişə çətindir. Bu ad hər zaman tarixin müəyyən dönəmlərində çətin, acılı məqamlarla üzləşib. Bu gün həmin ağır günlərdən biridir. Yaddaşımızı hər zaman yeniləməyə ehtiyac var".

O bildirib ki, düz 28 il bundan qabaq bəşər tarixinin ən önəmli faciələrindən biri olub:

"Xocalıda, öz evlərində yaşayan 613 məsum, tamamilə günahsız insan qətlə yetirilib. Nə qədər uşaq valideynsiz qalıb. Cavan-qoca, uşaq-qadın fərqi qoymadan vəhşicəshinə qətliam törədilib. Bu gün o şəhidləri ehtiramla yad edirik. Ailələrinin, xalqın acılarını paylaşıyırıq. Təsəvvür edin, 100 ailə tamamilə məhv olub. Bu səbəbdən "Qarabağ" Futbol Klubu fərqli missiya daşıyır" - deyə o bildirib.

Klub rəhbərinin sözlərinə görə, "Qarabağ" Futbol Klubunun məqsədi bütün dünyaya Xocalı faciəsini, qətliamını, Qarabağın – torpaqlarımızın işğalını bütün dünyaya çatdırmaqda vasitəçilik etməkdir: 

"Tam səmimi deyirəm, əsas məqsədimiz budur. Bizim məqsədimiz klubun adına xidmət etməkdir. Necə? Klub adına uğurlu futbol oynamaq, uğurlar qazanmaq və təbii ki, klubunun özəl mənəviyyatını sərgiləməklə. "Qarabağ" FK üçün mənəviyyat hər şeydən daha önəmlidir. Mən "Qarabağ"la, bu adı daşımağımızla fəxr edirəm. Və mən düşünürəm ki, biz birliyimizlə, cəsarətimizlə, uğurlarımızla, mənəviyyatımızla bu adı daşımağa layiqik. Biz Qarabağ naminə olan məsuliyyətimizi idrak edirik. Başda klubun prezidenti Abdulbari Goozalin baxışlarıyla bütünləşən klubumuzun fəlsəfəsiylə qürur duyuruq. Bir daha qeyd edirəm ki, Xocalı soyqırımı nəinki Azərbaycanın, eyni zamanda bütün ümumbəşəri faciədir".