AFFA prezidenti "Qarabağ"dan Avroliqada daha çox uğur gözləyir
Futbol
30 Avqust 2019 - 18:01
"Avropanın ikinci ən nüfuzlu klub turnirinin qrup mərhələsinə növbəti dəfə yüksəlməsi münasibətilə "Qarabağ" klubunun bütün kollektivini təbrik edirəm".
Supersport.Az xəbər verir ki, AFFA-nın prezidenti Rövnəq Abdullayev qurumun rəsmi saytına açıqlamasında belə deyib.
Supersport.Az xəbər verir ki, AFFA-nın prezidenti Rövnəq Abdullayev qurumun rəsmi saytına açıqlamasında belə deyib.
Federasiya rəhbəri, ardıcıl 6-cı dəfə avrokuboklarda qrupa vəsiqə qazanan "Qarabağ"ın azarkeşlərinə, ölkəmizin futbol ictimaiyyətinə böyük sevinc hissləri yaşatdığını bildirib:
"İllər öncə "Neftçi"nin UEFA Avropa Liqasının qrup mərhələsində çıxış etməsi, sonra "Qəbələ" klubunun eyni nəticəyə iki dəfə imza atması və təbii ki, "Qarabağ"ın ardıcıl uğurları Azərbaycan futbolunda stabilliyin göstəriciləridir. Klublarımızın dəfələrlə UEFA Avropa Liqasının qrupuna vəsiqə qazanması bu turniri bizim üçün sanki doğmalaşdırıb. Üstəlik, bu il Avropa Liqasının final oyununun Bakı Olimpiya Stadionunda keçirilməsi ilə Azərbaycan futbol ailəsi olaraq təşkilati baxımdan turnirin tarixində özünəməxsus mövqe tutmağı bacarmışıq. Artıq qrup mərhələsinin püşkü atılıb. "Qarabağ" A qrupunda "Sevilya", APOEL və "Düdelanj" komandaları ilə mübarizə aparacaq. İspaniya, Kipr və Lüksemburq təmsilçilərinə qarşı oyunlarda komandamızın uğurlu çıxış edəcəyinə inanırıq. "Qarabağ"a qrup mərhələsində uğurlar və idman xoşbəxtliyi, mövsümün qarşıdakı hissəsində Avropa Liqasında 6 deyil, daha çox oyun keçirməsini arzulayıram".
