Azərbaycan idman mətbuatında da ədalətsizlik mövcuddur.
Ötən il mətbuata dəstək məqsədilə yaradılan AFFA yanında Media Komitəsinin bir sıra haqsız qərarlar verməsi bəzi saytların ciddi narazılığına və sərt addımlar atmasına səbəb olub.
Supersport.Az, idman mətbuatında ədalətsizliyə son qoyulması üçün yanvarın 17-də Azərbaycan Respublikasının Prezidenti cənab İlham Əliyevə müraciət edib. Ümid edirik ki, bu problem həll olunacaq.
Prezident İlham Əliyevə müraciətimizi təqdim edirik:
Hörmətli Prezident!
Cənab İlham Əliyev, Supersport.Az saytının rəhbəri Anar Kamil oğlu Cəfərov olaraq Sizə idman mətbuatında üzləşdiyimiz ədalətsizliklə bağlı müraciət etmək məcburiyyətində qaldım.
Ötən il mətbuata dəstək məqsədilə AFFA yanında Media Komitəsi yaradıldı, İdarə Heyətinə üzvlər – Mahir Rüstəmli, İxtiyar Əsgərov, Vüqar Zeynalov, Kənan Məstəliyev, Elçin Cəlilov, İlqar Tağıyev və Elmir Əliyev seçildi. Komitənin əsas işi müxtəlif layihələrin həyata keçirilməsi üçün AFFA-nın ayırdığı büdcəni çətin günlərini yaşayan idman mediasına ədalətli və obyektiv bölüşdürməklə kömək etmək idi. Çox təəssüf ki, Media Komitəsi vəzifəsinin öhdəsindən gələ bilmir. Bölgələrə səfərlər zamanı ən yaxşı çalışan jurnalistlərə mükafat ayrılması yaxşı fikir olsa da, qiymətləndirmədə obyektivliyin olmaması idman mətbuatında ciddi narazılıqlara səbəb oldu və bir çox saytlar bu layihədə iştirakdan imtina etdilər. Digər layihə isə Azərbaycan idmanının, xüsusən də, futbolunun geniş işıqlandırılmasına, qaranlıq qalan hadisələrin araşdırılmasına hesablanmışdı. Ancaq bu da istənilən effekti vermədi. Bəzi saytlar layihələrin seçimi zamanı ədalətsizlik olunduğunu bəyan edərək, komitədən ayrıldı. Hətta iş o yerə çatdı ki, mənim də şəxsən iştirak etdiyim Media Komitəsinin toplantılarından birində İdarə Heyətinin bəzi üzvləri, özlərinin dediyi kimi “sıfır səviyyədə yazılan layihəyə” birinci yer verdiklərini etiraf etdilər.
Məlumat üçün bildirim ki, komitənin fəaliyyətindən narazı olan İdarə Heyətinin üzvü İxtiyar Əsgərov istefa verib.
AFFA yanında Media Komitəsi təsis olunan zaman Supersport.Az saytı da, bu qurumun idmanımız və futbolumuza faydalı olacağını düşünərək komitəyə üzv oldu. Ölkədaxili yarışların ən yaxşı şəkildə işıqlandırılması ilə bağlı ilk layihəmiz komitə tərəfindən qalib seçildi. Lakin Media Komitəsi məntiqsiz şəkildə bəzi başqa idman saytlarının əvvəlki müsabiqədə layihəni zəif icra etməsini səbəb kimi göstərərək 1500 manat dəyərində olan layihəmizin ümumi məbləğini 300 manat azaltdı. Layihəmiz başa çatdıqdan sonra komitə idarə heyəti adına layihəmizi qiymətləndirən mentor, işlərin yüksək səviyyədə həyata keçirilməsi haqda müsbət rəy verdi. Ancaq ölkədaxili yarışlarla bağlı daha yaxşı yazdığımız ikinci layihənin seçimi zamanı böyük ədalətsizliyə məruz qaldıq. Bu layihəmizdə idman mediasının diqqətindən yayınan planlar da əksini tapmışdı. Media Komitəsi bu layihəmizi ən yaxşı hesab etdiyini bildirsə də, qəribədir ki, bizi qaliblər sırasına daxil etmədi. Ötən il oktyabrın 23-də komitənin iclasında iradlarımızı, ədalətsiz qərar verildiyini bildirdim. AFFA nümayəndəsi Firuz Abdullanın da iştirak etdiyi iclasda Komitənin İdarə Heyətinin 4 üzvü – Mahir Rüstəmli, Elçin Cəlilov, Elmir Əliyev, İlqar Tağıyev tənqidimizi susqunluqla qarşıladı, bir daha belə haqsızlıq olmayacağına dair söz verildi. Hətta layihə təqdim etdiyimiz istiqamət üzrə zəif layihənin qaliblər sırasına daxil edildiyi də elə həmin iclasda etiraf olundu. Təəssüf ki, bu haqsızlığa qarşı AFFA-nın baş katibi Cənab Elxan Məmmədova 25 oktyabr 2016-cı il tarixində [email protected] adresinə ünvanladığımız rəsmi müraciətimizə də etinasız yanaşıldı. Bu proseslərin ümumi nəticəsində isə Media Komitəsinin yanvar ayında yekunlaşan növbəti müsabiqəsində ikinci dəfə haqsızlıqla üzləşdik və yaxşı yazılmış növbəti layihəmiz yenə qəbul olunmadı.
Supersport.Az, Media Komitəsinin əksər qərarlarını idman mətbuatına həm maddi, həm də mənəvi zərbə kimi qiymətləndirir.
Cənab Prezident, hesab edirik ki, Media Komitəsinin bu cür qərarları eyni zamanda Sizin məqsədyönlü idmana dövlət dəstəyi siyasətini də sabotaj etmək cəhdlərindəndir.
Cənab Prezident, Supersport.Az saytı Sizin bu problemin həll və ədalətin bərpa olunacağına köməklik edəcəyinizə inanır. Xahiş edirik ki, Media Komitəsinin fəaliyyətinin araşdırılması üçün komissiya yaradılsın və obyektiv araşdırmalar sonunda ədalət təmin edilsin. Mən obyektiv araşdırmalar nəticəsində layihəmizin haqq etdiyi qiyməti alacağına inanıram.
Məlumat üçün bildirim ki, rəhbərlik etdiyim Supersport.Az saytı 2009-cu ildə təsis olunub və Mətbuat Şurasının üzvüdür.
Saytımız yarandığı gündən ölkəmizin idman həyatını, həmçinin idmançılarımızın mötəbər yarışlarda uğurlu çıxışını yüksək səviyyədə təqdim etməyə çalışıb. Fəaliyyətimizin məntiqi nəticəsi olaraq həm respublikamızın, həm də xarici ölkələrin mətbuat orqanları portalımızın məlumatları və videogörüntülərindən faydalanıb.
Supersport.Az-ın internet kanalını iki il müddətində 2 milyon nəfər izləyib. Türkiyə, İngiltərə, Rusiya, Fransa və digər ölkələrin mediası saytımızın videogörüntülərindən istifadə edir. Ölkəmizə faydalı olması naminə hətta videoçəkilişlərimiz nüfuzlu ölkə komandalarımızın UEFA-dan haqsız cəza almasına mane olmaq üçün də istifadə edilib.
Hörmətlə,
Supersport.Az saytının baş redaktoru Anar Cəfərov
