Bakıda dünya çempionatında tanınmış simalar - Foto-Video

Supersport.Az Bakıda təşkil olunan taekvondo üzrə dünya çempionatının açılış mərasimini videogörüntüyə alıb.

Bakı Kristal Zalında keçirilən tədbiri Prezident İlham Əliyev, birinci xanım Mehriban Əliyeva, gənclər və idman naziri Fərid Qayıbov, daxili işlər naziri Vilayət Eyvazov, Azərbaycan Taekvondo Federasiyasının prezidenti Kəmaləddin Heydərov və digər rəsmi şəxslər izləyiblər.
İlk olaraq iştirakçı ölkələrin bayraqları arenaya gətirilib.
Dünya Taekvondo Federasiyasının himninin səsləndirilməsinin, qurumun bayrağının nümayiş etdirilməsinin ardından Azərbaycanın nəhəng bayrağı gətirilib, Dövlət Himni səsləndirilib.

Hakimlərin və idmançıların andiçməsindən sonra Dünya Taekvondo Federasiyasının prezidenti Çunqvon Çun çıxış edərək hər kəsi salamlayıb: "Burada çempionatın keçirilməsindən çox məmnunuq. Azərbaycanda və Bakıda müxtəlif taekvondo tədbirləri təşkil olunub. Prezident İlham Əliyevin dəstəyi nəticəsində bu idman növü ölkədə geniş vüsət alır".

Mərasimdə Beynəlxalq Olimpiya Komitəsinin prezidenti Tomas Baxın videomüraciəti təqdim olunub. O, taekvondonun dünyada ən məşhur idman növlərindən biri olduğunu söyləyib və onun insanların birliyi üçün əhəmiyyətli olduğunu qeyd edib.

Azərbaycan Taekvondo Federasiyasının prezidenti Kəmaləddin Heydərov taekvondonun ölkədə özünəməxsus yeri olduğunu və gənclərdə bu idman növünə marağın artdığını vurğulayıb. O, dünya çempionatının təşkilini Azərbaycana həvalə etdikləri üçün beynəlxalq federasiyaya təşəkkürünü bildirib, idmançılara uğurlar arzulayıb.
Gənclər və idman naziri Fərid Qayıbovun dünya çempionatını açıq elan etməsindən sonra Ulu Öndər Heydər Əliyevin Azərbaycan idmanına bəxş etdiyi töhfələrdən bəhs olunan videoçarx göstərilib.