İkiqat Avropa çempionu İlkin Şahbazovdan ustad dərsi - Video

Supersport.Az Bakıda baş tutacaq Taekvondo üzrə Dünya Çempionatı çərçivəsində Heydər
Əliyev Mərkəzinin parkında təşkil olunan master klassdan videogörüntü hazırlayıb.

İkiqat Avropa çempionu, əməkdar idman ustası İlkin Şahbazov 100-ə qədər idmançıya taekvondodan ustad təlimi keçib. Beş hissədən ibarət tədbirin ilk hissəsində ümumi komanda ilə birgə baza hərəkətləri edilib. II hissədə qızların xəyali döyüş səhnəsi canlandırılıb. Növbəti hissədə uşaq və yeniyetmə taekvondoçuların iştirakı ilə döyüş hərəkətləri ilə bağlı məşqlərə üstünlük verilib. Son iki hissə böyüklərin xəyali səhnəsi olan pumseyə və komandanın döyüşlərinə həsr olunub.

Tədbirdə, həmçinin Vətən müharibəsində iştirak etmiş taekvondoçulara
Azərbaycan Taekvondo Federasiyasının rəhbərliyi tərəfindən müxtəlif hədiyyələr təqdim
edilib.

Xatırladaq ki, 29 may-4 iyunda Bakıda Taekvondo üzrə 26-cı Dünya Çempionatı
keçiriləcək. Beynəlxalq əhəmiyyətli idman tədbiri, Dünya Taekvondo Federasiyasının 50
illiyi və Heydər Əliyevin anadan olmasının 100 illiyi vaxtında olacaq.
Yarışla əlaqədar paytaxtımıza 3 minədək qonağın gəlişi gözlənilir.