Türkiyədən İspaniyaya dərs - 9-cu çempionluq sevinci - Foto-Video

Supersport.Az-ın məlumatına görə, 16 yaşlı futbolçulardan ibarət yığma komandaların 20-ci "Ege Kuboku"nun qalibi müəyyənləşib. Türkiyə seçməsi finalda İspaniyanı 2:0 hesabıyla məğlub edərək, birinci yeri tutub. "Ay-ulduz"lu komandadan qolları 60 və 71-ci dəqiqələrdə Ömər Faruk Bəyaz vurub. İspaniya yığmasında qolkiper Alejandro Iturbe Enkabo, 57-ci dəqiqədə ikinci sarı, ardından qırmızı vərəqə alaraq, meydandan kənarlaşdırılıb. Türkiyə 9-cu dəfə yarışın qalibi adını qazanıb. 2007-ci ildə türklər finalda ispanlara 1:0 hesabıyla qalib gəlmişdi.

Turnirin üçüncü yeri uğrunda İngiltərə - Rusiya oyununda əsas vaxt qollu bərabərliklə başa çatıb. Penalti seriyasında ingilislər 4:2 hesablı qələbəyə seviniblər.

Yarışın ən centilmen komandası İngiltərə, finalın ən dəyərli futbolçusu mükafatını Türkiyə yığmasının əsas silahı Ömər Faruk Bəyaz alıb. İngilis Liam Delap isə 5 qolla bombardir olub.

Xatırladaq ki, TFF-dən AFFA-ya dəvət gəlsə də, U-16 yığmamız yarışda iştirak etməmişdi.