96-cı dəfə çempion oldu

Supersport.Az-ın məlumatına görə, isveçrəli tennisçi Rojer Federer mötəbər "Australian Open" turnirinin qalibi olub.

36 yaşlı tennisçi finalda xorvatiyalı Marin Çiliçi məğlub edib. Oyun 3-2 (6-2, 6-7, 6-3, 3-6, 6-1) hesabı ilə dünyanın ikinci raket ustasının xeyrinə başa çatıb. Final matçı 3 saat 3 dəqiqə davam edib.

Yarışın ümumi mükafat fondu 43 milyon dollardır.  Federer "Böyük dəbilqə" turnirlərində 20-ci qələbəsini qazanaraq rekordçudur.

Qeyd edək ki, ötən il Uimbldonda "Böyük dəbilqə" seriyasının finalında da R. Federer xorvatiyalı idmançını məğlub edib.

İsveçrəli tennisçi, Avstraliya yarışında 6, Uimbldon turnirində 8, ABŞ yarışında 5 və Fransada 1 dəfə qalib adını qazanıb.

36 yaşlı Federer, karyerasında 96-cı dəfə fərdi yarışda çempion olub.

"Böyük dəbilqə" turnirlərinin ən çox qalibləri:

1. Rojer Federer (İsveçrə) - 20 çempionluq

2. Rafael Nadal (İspaniya) - 16

3. Pete Sampras (ABŞ) - 14

4. Roy Emerson (Avstraliya) - 12

5.Novak Çokoviç (Serbiya) - 12

6. Rod Laver (Avstraliya) - 11

7. Björn Borq (İsveç) - 11

8. Bill Tilden (ABŞ) - 10