"Neftçi"nin düşmənləri qovulur: 1 milyon "yedi", aranı qarışdırdı, kənarlaşdırıldı

"Neftçi"ni ölü vəziyyətinə gətiriblər. Paytaxt təmsilçisi ötən mövsüm ölkə yarışlarında fiaskoya uğradı, Avropa  turnirində iştirak arzusu da puç oldu.

SOCAR prezidenti Rövşən Nəcəfin rəhbərliyi dövründə olduğu kimi, Hafiz Zeynalovun başçılığı altında klub uğursuzluğunu davam etdirir.

"Neftçi"nin Müşahidə Şurasının üzvü, elm və təhsil naziri, Azərbaycan Basketbol Federasiyasının prezidenti Emin Əmrullayev də prosesləri yalnız müşahidə etməklə məşğuldur.

Keçmiş səhvlərdən dərs almayıblar. Komandanın daxilində qruplaşmalar, milyonları dağıdanlar, ciblərinə dolduranlar var.

Bir ildən sonra nəhayət "Neftçi" ayıldı ki, klubun düşmənlərindən biri idman direktoru Yens Anderssondur. Paytaxf təmsilçisi bu şəxsi kənarlaşdırıb. "Neftçi" məlumat yayıb ki, müqaviləyə isveçli şəxsin öz xahişi ilə qarşılıqlı razılıq əsasında xitam verilib və bu qərar komandanın son həftələrdə göstərdiyi nəticələrlə əlaqədar deyil.

Yens Andersson 2023-cü ilin sentyabrından "ağ-qaralar"da çalışırdı.

"Neftçi" futbolçu seçimində olduğu kimi, idarəçilik məsələsində də səhv yolla getdiyini təsdiqlədi. İsveçli futbol adamı 1 il ərzində Azərbaycan klubunda azı 1 milyon manat qazandı. "Neftçi" nə qədər "ört-basdır" etməyə çalışsa da, komandanın "ölü"yə çevrilməsində Yens Andersson da əsas günahkardır. O, aranı qarışdırırdı. Əvvəla, bəzi səviyyəsiz futbolçuları gətirərək, bundan da qazanc əldə etdi.  Daha çox "yeyib-yatmaq"la yadda qaldı. Yens Andersson futbolçulardan Emin Mahmudovla Qara Qarayevin "vurulması"nda rol oynayırdı. Hətta əldə etdiyimiz məlumata görə, o, getməzdən əvvəl hər iki futbolçuya bildirmişdi ki, komandada qalmaları üçün klubun təklif etdiyi məbləğə razı olmalıdırlar, əks halda, göndəriləcəklər. Eminlə Qara isə ona deyib ki, öz pulun azaldılmalıdır. Yeni baş məşqçi Roman Qriqorçuk Qara Qarayevi əvəzedici komandaya göndərib. Kapitan Emin Mahmudovun sıxışdırlmasının davam etməsi mənfi haldır.

SOCAR prezidenti Rövşən Nəcəfin gətirdiyi Yens Anderssonun yeni baş icraçı direktor Cenk Sümerlə də münasibətləri pis idi. Komandanın düşməninə çevrilən isveçli şəxsin qovulmasında bu çəkişmənin də rolu oldu. 

"Neftçi"ni bərbad vəziyyətə salanların ən yekəsi idman müşaviri  Kamil Məmmədov hesab olunur. Bu şəxs komandaya gəldiyi gündən keyfiyyətsiz futbolçuları "sırımaq"la ciblərini doldurdu. Axırda da "ağ-qaralar" "qara" günə qaldılar: ölkə yarışlarında rəzil oldular, Avropa turnirindən də kənarda qaldılar.

"Neftçi"dən qovulacaq növbəti şəxsin Kamil Məmmədov olacağı gözlənilir.

Yeni baş Roman Qriqorçukun da vəziyyəti ağırdır. Onun da qovulmaq ərəfəsində olduğu bildirilir. Əlbəttə ki, 6 oyundan 4  xal toplayan, qələbəsiz, 9-cu pillədə olan autsayder komandanın belə çıxışı rəhbərliyi qəzəbləndirib: baş məşqçidən çempion "Qarabağ"dan xal qoparmaq tələb olunub. Əks halda, istefa qaçılmaz ola bilər.

Ukraynalı məşqçinin bəzi klub rəsmiləri və futbolçularıyla konflikti olması da komandanı bataqlığa salıb. Çox güman ki, buna görə, bir neçə oyunçunun qəsdən yaxşı oynamaması səbəbindən "Neftçi" son matçda "Zirə"yə məğlub oldu. Oyundan əvvəl pafoslu, lovğa danışan Qriqorçuk, matçdan sonra üzr istəmək məcburiyyətində qaldı, səhhətindən şikayətləndi.

"Neftçi" qarşıdakı oyunda yeni təmir olunan "Neftçi Arena"da "Qarabağ"a da məğlub olacağından, azarkeşlərin sərt təzyiqindən qorxaraq, matçın məkanının Suraxanıya dəyişdirilməsinə nail oldu. Bu oyunda da paytaxt klubunun məğlub olacağı təqdirdə, baş məşqçi Roman Qriqorçuku istefaya göndərib "Sumqayıt"ın prezidenti Riad Rəfiyevlə münaqişəsi olan baş məşqçi Samir Abbasovu gətirəcəyi bildirilir.

Görün, "flaqman"ı necə vəziyyətə gətiriblər ki, çempionluq yox, premyer liqada qalmaq uğrunda mübarizə aparır. 

"Neftçi"də talana, yalana, saxtakarlığa son qoyulmadıqca, vəziyyət belə davam edəcək.

Anar Cəfərsoy