Cüdo yığmamızdan uğurlu nəticə – Hüseyn Məmmədovdan sürpriz

 

Paytaxtımızda keçirilən Yeniyetmələrin Avropa Olimpiya Festivalında (EYOF) cüdo yarışları davam edir.

Supersport.Az-ın məlumatına görə, fərdi yarışların son günündə Azərbaycan cüdoçuları daha 2 medal qazanıblar. +90 çəki dərəcəsində mübarizə aparan Hüseyn Məmmədov bütün rəqiblərinə qalib gələrək Olimpiya Festivalının qızıl medalına sahib olub. Cüdoçumuz Almaniya, Yunanıstan, Moldova və Rusiya idmançılarını məğlub edərək fəxri kürsünün ən yüksək pilləsinə qalxıb. 81 kq çəki dərəcəsində yarışan Məhərrəm İmamverdiyev Yeniyetmələrin Avropa Olimpiya Festivalında bürünc medala layiq görülüb. Beləliklə, yeniyetmələrdən ibarət milli komandamız EYOF-da fərdi yarışlarda aktivinə 6 medal yazdırıb. Yarışların ilk iki günündə Turan Bayramov qızıl, Vüqar Talıbov gümüş, Şükran Zamanlı və Gülşən Bəşirova bürünc medala layiq görülüb. İyulun 27-də komanda yarışlarında qaliblərin adına aydınlıq gələcək. Azərbaycan millisi ilk olaraq Gürcüstan yığması ilə qarşılaşacaq.

Qeyd edək ki, Olimpiya Festivalına 40 ölkədən 297 cüdoçu qatılıb. Onlardan 165-i oğlan, 132-i qadındır. Heydər Əliyev adına İdman Sarayında baş tutan cüdo yarışlarına saat 11:00-da start verilir.