Lionel Messi və komanda yoldaşlarının Bakıya gələcəyi tarix dəqiqləşdi

Supersport.Az-ın məlumatına görə, dünya futbolunun əfsanəsi Lionel Messi, həmçinin komanda yoldaşlarından Luis Suarez, Serxio Buskets (Sergio Busquets) və Xordi Alba (Jordi Alba) Bakıya gələcəklər.

Hazırda bu futbolçular ABŞ-ın "İnter Mayami" klubunda çıxış edirlər.

Dekabrın 11-də Bakı Kristal Zalında keçiriləcək tədbirdə pərəstişkarlar dünyanın ən yaxşı futbolçusu – dünya çempionu, səkkiz dəfə "Qızıl top" mükafatı qazanan Lionel Messi və komanda yoldaşlarını görmək imkanı qazanacaqlar. Tədbir 13:00-da başlayacaq.

İştirakçılar futbol ulduzları ilə birlikdə maraqlı, unudulmaz anlar yaşayacaq. Messinin futbol həyatını və mübarizəsini əks etdirən unikal film təqdim olunacaq.

Tədbirin bilet satışından əldə olunan vəsait xeyriyyə məqsədinə yönəldiləcək.