“Bakı-2017” IV İslam Həmrəyliyi Oyunları 34 ölkədə yayımlanacaq

“Bakı-2017” IV İslam Həmrəyliyi Oyunları 34 ölkədə yayımlanacaq
İslamiada-2017, Digər
13 Aprel 2017 - 08:42
"Bakı-2017” IV İslam Həmrəyliyi Oyunları Əməliyyat Komitəsi ilə bu mötəbər turnirin yayım hüququnu əldə edən 34 ölkənin müvafiq şirkətləri arasında razılıq əldə olunub.

Supersport.Az xəbər verir ki, oyunların keçirilməsinə bir ay qaldığı müddətdə elan olunan razılığa əsasən, bütün yayım şirkətləri mayın 12-də və 22-də Bakı Olimpiya Stadionunda keçiriləcək açılış və bağlanış mərasimlərinin canlı yayımlanması, Oyunların ən yaxşı idman yarışlarından və medal uğrunda mübarizələrindən ibarət bir saatlıq gündəlik proqram hazırlayacaqlar. Həmçinin həmin şirkətlərə Türkiyə, Kamerun, Seneqal, Səudiyyə Ərəbistanı, Oman, Fələstin, Əlcəzair və Azərbaycan komandaları arasında keçiriləcək futbol üzrə 16 matçın canlı yayımlanması, Oyunlar haqqında iki saatlıq proqramlar zamanı eksklüziv yayımdan istifadə hüququna malik olacaqlar.

Şimali Afrika və Orta Şərq ölkələrində yayım hüququnu Ərəb Dövlətlərinin Yayım Birliyi (Arab States Broadcasting Union “ASBU”) əldə edib. İyirmi iki ölkənin əsas ödənişsiz dövlət yayım şirkətləri də “Bakı-2017” IV İslam Həmrəyliyi Oyunlarını öz kanallarında nümayiş etdirmək imkanı əldə ediblər.

“TV Media Sport” (TVMS) Böyük Səhradan cənubda yerləşən Afrika ölkələrinin eksklüziv agenti qismində razılığı imzalayıb. TVMS 12 ölkənin yayım şirkətləri - Fil Dişi Sahili (RTI), Nigeriya (NTA Sports 24), Tanzaniya (AZAM MEDIA GROUP ZBC2), Uqanda (UBC), Mozambik (TVM), Çad (ONRTV), Mali (ORTM), Qvineya (RTG), Niger (ORTN), Konqo Demokratik Respublikası (RTNC), Mavriki (MBC) və Burkina-Faso (RTB) qarşısında oyunlardan canlı yayımların və proqramların yayımlanması ilə bağlı öhdəlik götürüb.

“TV Media Sport” şirkətinin prezidenti Hedi Hamel razılıq barədə danışaraq deyib: “Beynəlxalq idman tədbirlərinin şaxələndirilməsi hər zaman “TV Media Sport” şirkətinin güclü fəaliyyət istiqamətlərindən biri olub və olmaqdadır. “Bakı-2017” IV İslam Həmrəyliyi Oyunları bu strategiyamızın mükəmməl təcəssümü olacaq”.

Bundan əlavə, “Bakı-2017” Türkiyənin aparıcı yayım televiziya kanalı olan TRT ilə müqavilə imzalayıb. Oyunların işıqlandırılması Surinamda və Qayanada IP vasitəsilə ATV və Milli Rabitə Şəbəkəsi tərəfindən yayımlanacaq.

Digər xəbərlər