Supersport.Az xəbər verir ki, Azərbaycan Premyer Liqasının 9-cu turunda “Qarabağ”ı qəbul edəcək “Neftçi”nin baş məşqçisi Adrian Mutu klubun televiziyasına açıqlamasında fikirlərini bölüşüb.
Rumıniyalı mütəxəssis oyuna hazır olduqlarını bildirib:
“Məşqlərimiz yaxşı keçir. Bizi necə matçın gözlədiyini bilirik. Əlimizdən gələnin ən yaxşısını etməyə çalışacağıq. Ümid edirəm ki, azarkeşlər yenə böyük dəstək verərək yanımızda olacaqlar. Uyğunlaşma dövrü, demək olar ki, başa çatıb”.
“Elə oyunçularımız var ki, onlardan gözləntilərimiz daha çoxdur və komandaya böyük fayda verə bilərlər. Bunun üçün də zamana ehtiyac var” deyən baş məşqçi, zədəsini sağaldan yarımmüdafiəçi Eddi İsrafilova qarşılaşmada şans verəcəyini istisna etməyib: “Eddi İsrafilova “Qarabağ”la görüşdə bir neçə dəqiqə oynamaq imkanı verə bilərəm. O, milli komandaların oyunları ilə əlaqədar yaranacaq fasilədən sonrakı dönəm üçün tam hazır olacaq. Eddi bizə meydanda lazım olan futbolçulardandır. Komandaya təsirini xüsusi qeyd etmək lazımdır. Ona böyük hörmətim var”.
Oktyabrın 8-də keçiriləcək “Neftçi” – “Qarabağ” oyunu saat 19:30-da başlayacaq.
