Azərbaycan İslamiadada rekord sayda medal qazanmağa ümid edir

Azərbaycan İslam Həmrəyliyi Oyunlarının keçirilməsinə demək olar ki, tamamilə hazırdır. İlk komandalar ölkəmizə cümə axşamında gəlməyə başlamalıdırlar.

Futbol yarışları növbəti bazar ertəsi günü başlayacaq. A qrupunun birinci qarşılaşmasında Azərbaycan Kamerunla  oynayacaq.

"B" qrupunda isə 2015-ci ildə Asiya Kuboku üçün kvalifikasiya qazanması hər kəs üçün sürpriz olan Fələstin komandası Oman, Əlcəzair və Türkiyə ilə birlikdə beynəlxalq turnirdə yarışır.

Azərbaycan və İran kimi ölkələr Oyunlarda 300-dən çox idmançıdan ibarət olan güclü komandalarla iştirak etdiyi halda, bəzi ölkələr maliyyələşmə ilə bağlı çətinlik çəkirlər. Elə çərşənbə günü Oman üzgüçülük və atıcılıq yarışlarında iştirakından imtina etməyə məcbur olub.

Əvvəlki iki İslam Oyunlarında ev sahibliyi edən Səudiyyə Ərəbistanı və İndoneziya medal siyahılarında ən yüksək mövqelərdə yer almışdılar, bu səbəbdən, Azərbaycan da Oyunlarda yüksək nəticələr göstərməlidir.

2013-cü ilin Avropa Çempionatında 78 kq çəki dərəcəsində bürünc medal qazanmış və London 2012 Olimpiya Oyunlarında medal qazanmağa çox yaxınlaşmış ukraynalı İrina Kindzerska çərşənbə axşamı ev sahibliyi edən ölkənin cüdo komandasına qatılıb.

Ölkəmizin çərşənbə günü verdiyi elana görə, boks yığmasına həvəskar boks üzrə keçmiş dünya çempionları Cavid Çələbiyev (ən aşağı çəki dərəcəsi) və Məhəmmədrəsul Məcidov (ən ağır çəki dərəcəsi), o cümlədən keçən yay keçirilən Rio Oyunlarının açılış mərasimində Azərbaycan bayrağını daşıyan 2012-ci ilin Olimpiya Oyunlarının ağır çəki dərəcəsi üzrə bürünc medalçısı Teymur Məmmədov kimi güclü boksçular daxil edilib.

Digər döyüş idman növləri də ölkəmizin Səudiyyə Ərəbistanı və İndoneziyanın yolunu davam etdirməsinə bəslənilən ümidlər üçün böyük əhəmiyyətə malikdir. Karate və güləş yığmaları medal qazanmaq üçün böyük ambisiyaları olan bir çox xarici idmançını əhatə edir. Taekvondo komandası isə keçən həftə sonu Afina şəhərində keçirilmiş "DTF Prezident Kuboku"nda 8 medal qazanıb.

Azərbaycanlılar bu cür böyük idman tədbirinə ev sahibliyi etməkdən faydalanmağa və ictimaiyyəti velosiped idmanı və tennis kimi yeni idman növləri ilə maraqlandırmağa çalışır.

2017-ci il Azərbaycan Turu çərşənbə günü artıq başlayıb. 17 yaşlı tennisçi Rəsul Qocayevin isə Oyunlarda uğur qazanmasına böyük ümidlər bəslənilir.

"Biz medal qazanacağımızı gözləyirik. Əlbəttə ki, bunun üçün çox çalışmalıyıq. Biz hələ yeni başlamışıq, məncə, bir, ya iki ildən sonra Rəsul Qocayev çox yaxşı oyunçu olacaq. Onun bunun üçün bacarığı var," deyə milli komandanın baş məşqçisi Boris Bevanda "Vestnik Kavkaza" xəbər agentliyinə bildirib.